Minister-in leiṭha siamna hmun a tlawh

Agriculture minister C Lalrinsanga chuan, Agriculture Research Farm, Sihphir Neihbawia OP-12 Bio Fertiliser Production Unit leh Bio Pesticide Laboratory bunna atana in sak mekte nimin khan a tlawh a, Agriculture director Rohmingthanga Colney leh officer dangte'n an ṭawiawm.

C Larinsanga chuan, rannung (microbes) behchhana leiṭha (biofertiliser) siamna OP-12 Bio Fertiliser Production Unit dinna tur chu SEDP hmanga kalpui a nih thu a sawi a, "Leiṭha siam chhuah tur hi loneitute leh kut hnathawktute tana thil chhenfakawm tak a ni dawn," a ti a; thlai thar kawngah nasa takin kut hnathawktute a puih a rin thu a sawi.

OP-12 Bio-fertilizer hi CSIR-NEIST, Jorhat siam chhuah a ni a, technology neitu (patented) an ni. Thlai chi hrang hrang - buh, vaimim, alu, hmarcha, bawrhsaibe leh be lam chi hrang hrangah enchhin tawh niin, a ṭha tih finfiah a ni tawh.

Mizorama kalpui a nih theih nan Agriculture department leh Mizoram University-a Department of Biotechnology chuan thawhhona thuthlung ziakin hma an la mek a ni.