In luah man àwl/tihniam turin ngen

State Disaster Management Authority (SDMA) hnuaia State Executive Committee secretary Lalbiaksangi chuan, in leh dawr neitute hnena ngenna nimin khan a tichhuak a; inkhàrkhip kalpui chhung atan an in leh dawr luahtute hrethiam chunga luah man àwl emaw, tihniam emaw turin a ngen.

Lalbiaksangi chuan, Covid-19 hripuiin harsatna nasa tak a thlen tih tarlangin, "Nikum aṭang tawhin hun rei tak chhung lockdown kalpui a ngaih ṭhin avangin ei leh bàr zawn kawngah mi tam takin harsatna kan tâwk tawh a. Tunah pawh Covid-19 léng thawh hnihnain min nuai leh mek avangin ni 100 dáwn kan lo inkharkhip leh ta a ni," a ti.

Covid-19 vangin CCC-a inenkawl tam tak an awm thu leh thihpui eng emaw zat an awm tawh thu tarlangin Lalbiaksangi chuan, "Sumdawng leh ni tina inhlawhfa, thla tina dàwr luah man leh in luah man pek ngai, mahse, lockdown avanga sumdawnna leh ni tin inhlawhfâkna kalpui remchang si lo mi tam tak kan awm mek. Hetiang hun harsa kan tawn mek avangin in leh dawr luahtute hrethiam chunga dawr leh in luah man inàwl emaw, tihniam emaw turin kan inngen a ni," a ti.