Court-in building zawh hma atan RT-PCR lab. lailawk siam ngei ṭha a ti

Gauhati High Court (GHC), Aizawl Bench chuan nimin khan a ṭum hnihna atan RT-PCR for Chhimbialin PIL an thehluh chu a ngaihtuah a, laboratory building tur sak zawh a nih hma atan RT-PCR testing laboratory lo siam lailawk ngei ṭha a ti. PIL hi July 2, 2021 ah ngaihtuah leh a ni ang.

Court chuan Mizoram sorkarin ukilte affidavit thehluh aṭanga a lan danin kum 2020 khan Civil Hospital, Lungleiah RT-PCR laboratory atan building sa turin thutlukna a lo siam tawh thu tarlangin, "PWD chuan hemi atan hian estimate Rs. 1,40,61,400 an siam a, mahse Finance department chuan sum awm loh avangin an hnawl a ni," a ti.

Building thar cheng vbc. 7.8 senga sak tum chu proposal mai a la nih thu tarlangin Court chuan, "NEC pawmpuina la ngai thil a ni a, lo pawm pawh nise hun a duh rei dawn. Chuvangin, tun hun atan chuan building awmsa-ah RT-PCR laboratory lailawk siam mai ṭha kan ti," a ti a, he ngaihdan hi Mizoram sorkar ukil chuan Mizoram sorkar a hrilh tur thu an tarlang.

Mizoram sorkar aiawha ding Advocate General chuan Mizoram sorkar hnenah building sak thar a nih hma-a RT-PCR laboratory bunna tur building lo zawng tura thurawn a pek tur thu Court a hrilh.

RT-PCR laboratory atan a luhna hranpa a ngaih thu Mizoram sorkar affidavit-a tarlan a nih chungchangah Court chuan, "Building awmsa-a RT-PCR laboratory lailawk atana ruahmanin a luhna hran a neih dan tur ngaihtuah nise, building sakna tur nghah ai chuan," a ti.

Advocate General chuan affidavit dang thehlut leh tura hun pek a dil a, hei hi Court chuan remtihsakin July 1, 2021 thleng hun a pe. Chumi tuk July 2-ah PIL hi ngaihtuah leh a ni ang.

Tarlan tawh angin RT-PCR for Chhimbial aiawh hian JC Lalnunsanga a ding a ni.