Covid-19 vanga thi 1 awm belh

C Lalkamlova (78) h/o Robuangi, Saron Veng, Aizawl chu nimin zing dar 5:35 khan Covid-19 vangin SRH-ZMC-ah a thi a, nimin chhun dar 12 khan Saron Presbyterian Kohhran Jubilee Hall kawtah vui a ni. Sorkar record angin Mizorama hripui vanga thi 86-na a ni.

Sorkar thuchhuaka a lan danin, C Lalkamlova hi Covid-19 positive a ni tih June 6, 2021-ah hmuh chhuah a ni a, hun rei tak ICU-ah ventilator hmanga enkawl ni mah se, ni nga kal ta khan ICU aṭangin sawn chhuah a ni. A thih hma ni, June 22 khan RT-PCR hmanga a swab sample endiknaah negative mah se, Covid-19 kaihhnawiha thi a nih avangin Covid-19 vanga thiah chhiar a ni.