Covid-19 in Mizo puan humhalhna tur benchmark hman hun a tisukuk

Mizoram sorkar hnuaia 'Technical Sub-Committee on Inspection Structure for Geographical Indication of Traditional Mizo Puan' chuan Mizo puan panga humhalhna tur benchmark an siamṭha a, hman theih hun tur ­erawh Covid-19 hripui léng vangin hriat theih a ni lo.

Sub-Committee chairman Carol VLMS Dawngkimi chuan, Covid-19 boruak avangin an hmalak dan a khaihlak thu a sawi a, "Sub-Committee-ah hian kum upa tak tak kan awm avangin duh angin kan ṭhukhawm thei lo a, video conferencing hmangtein kan sawiho tawh a, mahse, chipchiar taka sawiho leh zirchian ngai a nih avangin a buaithlak rih," a ti.

Art & Culture department-in Mizo puan humhalhna tura an siam benchmark chu an ennawn hnuah siamṭhat an neih nual thu sawiin Chairman chuan, "Humhalh dan tur changtlung leh kimchang zawkin kan ngaihtuah a, eng emaw zat kan siamṭha a, a hman phal dan leh ṭul dangte pawh kan duang mek," a ti a; hman theih hun tur erawh hriat theih a la nih loh thu a sawi.

Nikum August 16 & 22 khan sorkar laipuia Department for Promotion of Industry and Internal Trade (DPIIT) chuan Mizo puan panga - Puanchei, Tawlh-lohpuan, Pawndum, Ngotekherh leh Hmàrám-te chu Mizo ta a ni tih chhinchhiahna geographical indication (GI) tag/registration a pe a ni.

Puan pangate humhalh dan tur buaipui tur hian Art & Culture department chuan kum thum term neiin Art & Culture Secretary kaihhruai 'Committee on Inspection Structure for Geographical Indication of Traditional Mizo Puan' a din a; Committee chuan department benchmark siam zûlzuia harsatna awm theite chîk zawka chhui chiang lehtu tur Technical Sub Committee a din leh bawk. Sub-Committee-ah hian Art & Culture department Joint Director chu chairman a ni a; member-te chu - Boi­chhingpuii (Chaltlang), Lalhlimpuii (Zarkawt), MISTIC scientific officer Samuel Lalmalsawma, MISTIC patent officer C Lalthanzuala leh Art & Culture-a technical assistant Vanlalhuma Singson-te an ni.