Olympic-a India tana hockey khel tur Lalremsiami tan cheng nuai 10 hlân
Chief minister Zoramthanga hoin nimin khan CMO Conference Hall-ah Summer Olympics 2020-a India tana hockey khel tura thlan Lalremsiami, Kolasib lawmpuina leh chawimawina hun hman a ni a, Sport minister Robert Romawia Royte leh FCSCA minister K Lalrinliana te pawh an tel.
CM Zoramthanga chuan, Lalremsiami chu Mizo nula zinga chhuanawm berte zinga mi a nih thu sawiin, "A thawhrimna leh inpekna hi a entawntlak a, chawimawi a phu hle. Hockey hi Mizote'n infiamna khawvelah advantage kan neihna a ni," a ti a; Olympic atan duhsakna a hlân.
Hockey chawi sáng zel turin sorkarin hma a lak thu leh Hockey India nena an inràwnna angin hockey tihhmasawn nan special committee siam a nih tur thu sawiin Zoramthanga chuan, "Hockey bakah sport discipline hrang hrang hmanga eizawnna ṭha tak tak nei Mizo zingah kan awm belh zel hi a lawmawm. Ṭhalaite eizawnna kawng ṭha tak a nih zel theih nan sport industry changtlung tak siam turin ruahmanna siam a ni," a ti.
Sport minister Robert Romawia chuan, India rama state tam takin an mi leh sa Olympic-a tel thei an neih loh thu sawiin, "Mizoramin Lalremsiami kan nei hi a lawmawm. Tun ṭuma sorkarin cheng nuai 10 a pek bakah cheng nuai 15 dang chu amah Lalremsiami ngei telin Olympic zawhah pek leh a ni ang," a ti a; Olympic-ah medal a dawn chuan lawmpuina dang pawh ngaihtuah a nih tur thu a sawi.
Robert Romawia chuan, Muallungthuah Khelo India aṭanga hmuh cheng nuai 550 hmangin hockey ground, phûl lem phah siam mek a nih thu a sawi a; Lunglei Salem Venga hockey ground siamna tur sanction cheng nuai 1108.70 hmuh a nih tawh thu a sawi bawk.
Lalremsiami lawmpuinaah hian Mizoram sorkarin cheng nuai 25 a pek tur aṭangin a aiawhtu, hockey coach hlui Lalrampari hnenah cheng nuai 10 hlan a ni a, cheng nuai 15 dang chu Olympic zawhah Lalremsiami kutah hlan tura ruahman a ni.
Olympics 2020 hi Japan khawpui Tokyo-ah July 23 - August 8, 2021 chhung neih tura a ni a, Lalremsiami hi Mizoram aṭanga hmeichhia Olympic-a tel thei awmchhun a ni.