Siaha district-ah total lockdown
Mizoramah Covid-19 vei hmuh chhuah thar mi 12 an awm avangin Siaha District Task Force on Covid-19 chuan nimin khan DC conference hall-ah emergency meeting an nei a; vawiin aṭanga tunkar Zirtawpni thleng district pumah total lockdown kalpui an rél.
Meeting kaihruaitu DC Bhupesh Chaudhary chuan, Covid-19 hri vei hmuh thar an awm avanga chîâi vak lo turin Siaha district mipui a ngen a, "State páwn aṭangin kan mi leh sa an lo thlen belh mek zel lai hian, tun aia inven dan ṭha zawk a awm em, tihte ngaihtuah a ngai a ni," a ti.
Meeting-a an rel danin, ni thum - June 3-5 chhung Siaha district-ah total lockdown kalpui tur a ni. Ni thum chhung chuan medical team-in quanrantine facility aṭanga chhuak tawh Tamil Nadu aṭanga haw mi 132-te chu an buaipui zui ang a, a ṭul angin swab test tih a ni ang.
Siaha SDO (Sadar) B Malsawmtluangi tarlan danin, Siaha district-ah Covid-19 kaihhnawihah cheng nuai 10 vel hman a ni tawh a, nuai 20 chuang leibá an nei mek. Mizoram sorkar aṭangin Covid-19 do nan cheng nuai 17 an hmu tawh a; DC Relief Fund-a sum lut Rs. 6,78,000 aṭangin Rs. 1,09,390 hman a ni tawh.
Nimin thleng khan Siaha district-a quarantine centre hrang hrangah mi 909 (mipa 502 leh hmeichhia 407) khung an ni tawh a; khung hran mek mi 25 leh state páwn aṭanga haw mek mi 172 an awm a ni.