Páwl hrang hrangin Covid-19 sawiho AAY leh BPL ngaihhnathiam an duh

Mizorama pawl hrang hrang hruaitute nimina Central YMA Committee Room-a ṭhukhawm chuan, sorkara lut bill hrang hrangah Antyodaya Anna Yojana (AAY) leh Below Poverty Line (BPL) chhungkuate sorkarin ngaihhnathiam rawh se, an ti.

Central YMA bultuma nimina ṭhut­khawmah hian CYMA hruai­tute bakah, Mizoram Kohhran Hruaitute Committee (MKHC), tlawmngai pawl - MUP, MHIP, MZP leh MSU te, political party - MNF, MPCC, ZPM, BJP, PC leh ZNP aiawh pahnih ṭheuh an tel a; Covid-19 léng mek donaa hma­lakho dan tur an sawi a ni.

Meeting kaihruaitu CYMA president Vanlalruata chuan, CYMA chuan thil pawimawh a awmin inhmuhkhawmna a buatsaih ṭhin tih sawiin, "Sorkar kan ni lo a, tlawmngai pawl, mi zawng zawng lenna kan ni. Kal dan turah rawtna hranpa kan nei chuang lo," a ti.

CYMA general secretary Prof. Lalnun­tluanga chuan, thawhhona ṭha leh awmze nei zawk a awm zel theih nan inràwnkhawmna buatsaih a nih thu sawiin, "Nasa taka hmalaknain Covid-19 donaah awmzia a nei chho a, a thawh hnihnaah erawh state dang an tlakhniam laiin kan tlahniam hlei thei lo," a ti a; theihtawp chhuaha hripui donaah thawhho zel a pawimawh thu a sawi.

Political party hrang hrang aiawhte chuan, Covid-19 dona atana ṭul leh ṭha nia an hriatte an sawi a; sorkar lai MNF party ai­awhte chuan political party dang­te'n zawhna leh thusawi ṭhenkhatte chhángin an sawifiah thung.

Zirlai pawl pahnih - MZP leh MSU lam chuan zirlaite hma­khaw lam an sawi ber a; MUP leh MHIP aiawhte chuan chaw ngheia ṭawngṭai an rawt a, hei hi MKHC-in a ṭul anga an bawhzui turah an dah.

Meeting chuan, "Hripui léng vanga kan harsatna tawh mekte inchhâwk zângkhai a nih theih nan, in/ dawr luah man inngaihhna­thiam ni se. BPL leh AAY chhungkuate sorkar bill hrang hrangah sorkarin ngaih­hna­thiam rawh se," tiin thu­tlukna (resolution) a siam a ni.