Kan dinhmun a ziaawm ṭanin kan hria - Dr ZR Thiamsanga
Covid-19 Medical Operational Team chairman Dr ZR Thiamsanga, MLA chuan, hripui léng mekah Mizoram dinhmun a ziaawm ṭana an hriat thu a sawi.
Nimina Central YMA bultuma MKHC, tlawmngai pawlte leh political party aiawhte ṭhutkhawmnaah Dr ZR Thiamsanga chuan, a tirah chuan Mizorama Covid-19 thihpui tam ber chu natna dang nei sa an nih thu a sawi a, "Tun hnuah erawh a thawk chakin a thawk na hle. Kum lama naupang deuh deuh hripui thihpui kan nei chho ta a ni," a ti.
Dr ZR Thiamsanga chuan, Covid-19 vei hmuh chhuah an tam chhan chu mass screening leh containment zone-ah sample endik tam vang a nia sawiin, "Hripui vei hmuh chhuah zingah hian kàina chin hriat loh an tlem sâwt hle. Kan ṭanhona Pathianin mal a sawm dawn niin kan hria," a ti a; hripui do kawngah an hlawhtling ngei dawna a hriat thu a sawi.
MOT Chairman chuan, kalphung avangin dam an awm chak lo tih sawiin, "State dangah chuan hripui veite'n ni 10 hnua symptom an neih loh chuan an chhuahtir mai zel. Contact tracing pawh hi keini chuan ni 10 chhungte kan ti a, state ṭhenkhatah chuan ni hnih chin velte an chhui lêt ṭhin," a ti.
A tirah Mizoramin health infrastructure a neih chhiat thu sawiin Dr ZR Thiamsanga chuan, "ZMC-ah khum 150 vel a awm a, ICU panga a awm. Tunah chuan khum 247 leh ICU khum 30 chuang a awm tawh. Khum 30 peih thawhkhat leh tawh a ni a, khum 30 dang buaipui leh mek a ni," a ti. Covid-19 léng thawh thumna thleng thei laka inbuatsaihna atan naupang enkawlna tur bik buatsaih mek a nih thu a sawi bawk.