Hmun hrang hrangah ṭanpuina hlân

Assembly speaker Lalrinliana Sailo chuan nimin khan a bial chhunga khaw hrang hrang hnena sem tur buhfai truck phur hnih a pe a, Thutak Nunpuitu Team (TNT), Muanna Veng hnenah buhfai ip eng emaw zat a pe bawk.

Aizawl South-II bialtu MLA Lalchhuanthanga pawhin Lailak khaw mite thlai thar 407 truck phur khat a lei chu June 23, Nilaini khan a bial chhunga Tlangnuam leh Tlangnuam Vengthara sem turin LTF-te kutah a a hlân. Lalchhuanthanga chuan, kut hnathawktute an luang chhuak ṭhin chu fakawm a tih thu sawiin, "A thlawna luan chhuah reng theih duh viau mah se, tih reng theih a ni bik lo a, Mizoram sorkar hian an harsatnate sukiang turin vegetable supply chain a rang thei ang bera a kalpui a ngai a ni," a ti.

Aizawl DC leh NGO Samarpann thawhhona kaltlangin Bawngkawn containment zone-a chhungkaw 50 leh Electric Veng containment zone-a chhungkaw 100 hnenah buhfai, tel, dailuah, alu leh thil dang eng emaw zat nimin khan sem a ni.

AMC Ward No. V councillor Rosiamngheta pawhin nimin khan a bial chhung Electric Veng, Zarkawt leh Chanmari Venga community covid care centre tlawhin, damdawi ṭhahnem tak a pe.