MNYF-in ráltlânte ṭanpuina an hlân

MNF ṭhalai hruaitute chuan June 23-24, 2021 chhung khan Mizoram khawchhak tlangdunga Myanmar ráltlânte hnenah ṭanpuina chi hrang hrang an hlân.

Myanmar raltlante ṭanpuina pe tur hian MNYF hruaitute hi an president Lalrinawma hoin an thawk chhuak a; raltlante hnena sem turin Tuipuiral group YMA hnenah buhfai quintal 60, hmai tuamna 2,000, blanket 120, silpauline leh kut tihfaina tam tham tak an hlân a ni.

MNF ṭhalai hruaitute hi Zawlseiah Tuipuiral group YMA hruaitute leh khawtlang hruaitute nen an inkawm bakah, Zawlseia relief camp tur sak mek a hmunah an tlawh a ni.

MNYF president Lalrinawma chuan, Mizoram chu hmun hrang hranga Mizo awmte tan inpui a nih angin an mangan ní-ah an rawn bèl ṭhin tih sawiin, "Tun ṭuma Burma rama buainaah pawh kan unaute'n Mizoram an rawn bèl leh a ni," a ti a; Tuipuiral huam chhung khaw hrang hrangin ráltlânte an buaipui dan chu lawmawm a tih thu a sawi.

Lalrinawma chuan, Mizoram sorkarin ráltlânte a ngaihtuah hle nia sawiin, "CM Pu Zoramthanga pawhin raltlante duat taka enkawl an nih tur thu a lo sawi tawh. Chutih rual chuan, raltlan chungchang hi central thu leh hla ngaihchàn ngai thil a nih avangin chêt nghal zung zung a remchan loh chin a awm thei a, chuti chung chuan sorkarin thui takin hma a la tawh a ni," a ti.