KHAWTHLIR
TNT-ah hripui vei hmuh belh
Nimin khan Covid-19 Medical Operational Team leh Aizawl East CMO ṭangkawp chuan TNT, Muanna Vengah swab sample serial test an kalpui a, mi 405 endik zingah hripui vei mi 125 hmuh belh a ni. Serial test-ah hian test neih tawha negative-te sample endik a ni. June 20-21, 2021-a TNT-a sample endikah hripui vei mi 555 hmuh chhuah a lo ni tawh bawk a, Covid-19 positive mi 680 vel hmuh an ni tawh a ni.
CCC thar siam
Health & Family Welfare secretary R Lalramnghaka chuan nimin khan ICFAI University, Durtlang chu Covid-19 veite enkawlna, Covid care centre (CCC) atan hman a nih tur thu a puang. ICFAI University CCC-ah hian khum 120 a awm dawn a ni.
Meth man
Assam Rifles leh Champhaia Customs official-te chuan nimin khan Champhai Chhungte-ah methamphetamine mûm 20,000 leh a neitua puh mi pahnih an man. Meth an man hi cheng nuai 100 mana chhut a ni.
Kawng khâr dawn
Chanmari (Chanmari West péng) leh Chanmari West kâwipui inkarah vawiin aṭangin SIPMIU-in pipe phûm hna an thawk dawn a; hei vang hian hna thawh zawh hma chu kawngpuiah lirthei tlân phal a ni dawn lo tih Traffic SP Rodingliana Chawngthu-in a puang.
Containment zone
Aizawl DC chuan Bethlehem Vengthlanga hmun ṭhenkhat chu containment zone-ah a puang. Tuithiang Veng, Saron Veng leh Bawngkawna containment zone-a puan tawh hmun ṭhenkhat chu containment zone a nihna a hlîp thung a; heng veng pathuma hmun ṭhenkhat chu containment zone-a a la ni zui zel bawk.
ICU-ah mi 24 awm
State Referral Hospital-ah nimin khan Covid-19 vei mi 16 dah luh niin, tlai dar 5 dinhmun angin mi 199 enkawl mek an ni a, an zinga mi 24 chu ICU-ah enkawl niin, ventilator hmangin mi 11 enkawl mek an ni. Ward-ah mi 175 enkawl niin, chu'ng zinga mi 64 chu oxygen pek mek an ni.