SEDP aṭanga bill tumsak turin ZLP-in Mizoram sorkar an phût

ZPM Legislature Party (ZLP) chuan, kut hnathawktute harsatna sutkian nan vegetable supply chain kalpui thuai tur leh SEDP sum aṭangin khawsak harsa zawkte electric bill leh tui bill tumsak turin Mizoram sorkar an phût.

Covid-19 hripuiin Mizoram mipui a nghawng dan sawihoa ZLP member-te June 23, Nilainia ṭhukhawm thuchhuah siamin, mipui harsatna leh mangan dan an hmuhin, a pawi an ti a, Mizoram sorkar chu thuràwn pek ṭha an tih thu an tarlang.

ZLP chuan, Mizorama kut hnathawktute ei bél ber, an thlai thar chhuahte awmze nei thei loa a awm mek chu sorkar tan mutmawh hnàrmawha neia buaipui a hun tawh tak zeta an hriat thu an sawi a, "Covid-19 vanga harsatna nasa tak tâwk mek kut hnathawktute harsatna sutkian a nih ngei theih nan vegetable supply chain hi chawpchilh taka kalpui leh turin sorkar kan phût a ni," an ti.

Ni tina eizawnga chhuak ṭhinte'n lockdown chhungin thawh chhuah an nei thei lo tih sawiin ZLP chuan, "Chhungkaw tam tak chu leiba ṭhahnem tak nen an awm mek a ni. Heng mite harsatna sukiang tur hian kan sorkar hian SEDP (2021-22) hnuaia cheng vbc. 400 a dah aṭang hian electric bill leh tui bill tumsak turin kan ngensak tak meuh a ni," an ti bawk.