Tui leh electric bill awl turin MLA-in Chief Minister a ngen

Hachhek bialtu MLA Lalrindika Ralte chuan total lockdown avanga mipui tawrhna chhâwk zângkhaina atan electric bill leh tui bill àwl rih turin nimin khan Chief Minister a ngen. Lalrindika hian a ngenna hi Chief Minister PS hnenah a hlân a ni.

Lalrindika Ralte chuan, Covid-19 léng thawh hnihna hluar zel avangin Mizo­ram sorkarin April 20, 2021 aṭangin inkhuah­khirhna a kalpui ṭan tih tarlangin, "Total lockdown thla hnih chuang kalpui a nih hnuah pawh hri kai zat a tlak­hniam theih si loh avangin lockdown puan chhunzawm a la ni ta reng a, hei vang hian mipui náwlpui dinhmun a harsa ta hle a ni," a ti.

Sumdawng tam takin sumdawnna an kalpui theih loh avangin an hnuaia hna thawkte thlengin an tuar nasa tih tarlangin MLA chuan, "Lirthei khalha eizawng te, loneitu te, ni tin chaw­hmeh zuar te, inhlawh chawpa khawsate pawhin an tuar nasa hle," a ti a; chhung­kaw tin sum lak luh nasa taka a tlakhniam thu a tarlang.

Lalrindika Ralte chuan, sum lak luh a tlakhniam laiin sorkara sum chhûn luh tur chhiah leh bill chi hrang hrang, in leh dawr luah man thla tina pek tur erawh a ngai reng tih tarlangin, "Hetiang a nih avang hian chhungkaw tam tak an tâlbuai mek a, in leh dawr luah man pe thei lo te, in luah man inàwltirte pawh tam tak an awm tawh. Tui bill leh electric bill ringawt pawh phurrit a tling tawh a ni," a ti.

Hachhek bialtu MLA tarlan danin, Covid-19 dona atan leh damlote enkawlna atan sorkarin cheng vaibelchhe tam tak a sèn tawh rualin, mipui pawhin nasa takin an tuar mek a ni.