College danga admission beiseite ANC-ah admission ti lo turin hriattir

Aizawl North College principal Prof. S Haukhanlian Mate chuan, an college-a Bachelor of Arts (B.A) first semester zir tura first selected list-a lang, college danga admission beisei thote chu an college-a admission ti lo turin a hriattir a; admission ti tawh, college danga admission ti lehte hnenah admission fee an pek lêt dawn loh thu a tarlang bawk.

June 23, 2021-a Aizawl North College (ANC) Principal-in hriattirna (notification) a chhuahah chuan, B.A first semester-a lut tur tan admission tih a hun leh tawh tih tarlangin, "Zirlai tam takte'n college hrang hrangah an dil kawp a. ANC pawhin dilna tam tak dawngin, 1st selected list a tichhuak ve ta a. ANC-a 1st selected list-a tel, college danga admission beisei kan awm a nih chuan admission lo ti lo turin kan inhriattir e. Admission lo ti lui kan awm a nih chuan admission fee kan refund thei dawn lo tih kan inhriattir bawk e," a ti.

Hetih lai hian, college-a admission ti tawh, hmun danga admission hmuh leh vanga college danga admission ti lehte hnena admission fee pek lêt phal loh hi University Grants Commission (UGC) dan kalh a nia thu dawn a ni.

UGC-in zirna-in sang (higher educational)-te tan admission fee leh original certificate pek lêt chungchangah hriattirna, kum 2018-a a tihchhuah, Notification on Refund of Fees and Non-Retention of Original Certificates ang chuan, zirlaiin a dil a nih chuan admission fee leh original certificate pek let tur a ni a; pek dan turah dan (kaihhruaina) siam a ni.

UGC notification 4.1.3-in a tarlan dan chuan, zirlai, college-a admission ti tawh chu eng emaw avanga zirna an chhunzawm thei lo emaw, zirna hmun an thlak duh a nih a, admission fee a dil lêt a nih chuan college-in a pe lêt tur a ni.

Fee pek lêt dìl hun a zirin pek lêt tur zat a danglam a; admission tih hun tàwp nan ni 15 leh a aia tam a la awm chuan a zavaiin (100%) pek lêt tur niin, hun tawp nan ni 15 aia tlem a la awm chuan 90% pek lêt tur a ni. Admission hun hawn tàwp ni aṭanga ni 15 ral hmaa dilin 80% leh ni 30 ral hmaa dilin 50% hmuh lêt theih a ni a, ni 30 a liam hnuah erawh chuan pek lêt loh theih a ni thung.

Aizawl North College Principle-in June 23, 2021-a hriattirna a chhuah hi National Stundents’ Union of India (NSUI) Mizoram chuan pawi an tih thu sawiin, sût turin an ngen.

NSUI Mizoram chuan, ANC Principal-in notification a chhuah chu zirlai dikna rah behna leh kum 2018-a UGC notification bawhchhiatna a nih thu tarlangin, "ANC Principal-in notification a chhuah hi cancel leh turin kan ngenin kan phût tlat a ni," an ti.