Chhiah âwl/tihniam turin sorkar ngen

ZPM Ṭhalai chuan thuchhuah siamin, sumdawng leh dawrkaite chhiah châwi àwl emaw, tihhniamsak emaw turin Mizoram sorkar an ngen.

ZPM ṭhalaite chuan, "Mizoram sorkar chu sumdawng leh dawrkaite chhiah chawi tihniam tur emaw, ngaidam tur emawin kan ngèn a, mi harsa zawkte tan bill leh chhiah chi hrang hrang ngaidam tur emaw, tihniam tur emawin kan ngèn bawk," an ti.

Mizoram sorkarin in leh dawr luah man awl emaw, tihniam emaw tura a neitute a ngen chu lawmawm an tih thu an sawi rualin ZPM Ṭhalai chuan, "Lockdown avanga sum lâk luhna dan chah a nih avangin chhungkaw tam tak chhuanchham dinhmuna an din mek avangin an tan ṭanpuina (welfare scheme) siamsak turin kan ngen a ni," an ti a; mipui inṭanpui tawn tura ngentu sorkar chu ram mipui tan entawn tur siamin hma hruai se an duh thu an sawi.

ZPM ṭhalaite chuan, ni 60 chuang lockdown kalpui a nih laiin kohhran, tlawmngai pawl leh mimal ṭhahnem tak chu nasa takin an luang chhuak tih an sawi a; Mizoram sorkar pawh lockdown avanga harsatna tâwkte ṭanpuina atan a sum báwm sawh keha luang chhuak ve turin an phût a ni.