Thingtlang mite chungah MNF lâwm

MNF party chuan thuchhuah siamin, Aizawl khawpui tana luang chhuak ṭhin thingtlang mipui chungah an lâwm thu an tarlang.

MNF chuan, thla hnih chuang Aizawlah inkhàrkhip a nih tawh avangin Aizawla chawhmeh lut turte hun rei tak dan chah a ni tawh tih sawiin, "Aizawl mipui tan khawsak a harsat phah hle a, tawrh zawh rual a ni ta lo," an ti a; chutih lai chuan thingtlang mite Aizawl tan an luang chhuak ṭhin tih an sawi.

Zo nun ze mawi, tlawmngaihna leh mi dangte ṭanpui ṭhinna chu a lang chhuak tih sawiin MNF chuan, "Hma lam hun thlira sum leh pai an tuakna tur, an ei bél ber leh an dam khawchhuahna tura an innghahna lian ber, ni tin a súr a sa hnuaia hah thi kúla an thawh chhuah thlai hrang hrangte Aizawl mipui chhuanchhama awm mai turte an lainat avangin, sum leh pai hlâwkna awm hauh loa ui lo leh phal taka an rawn luan chhuahtir ruih ruih avangin an chungah MNF chu a lawm tak zet a ni," an ti.

MNF party chuan, Aizawl mite duhsakna, lainatna leh khawngaihna lantirtu thingtlang mite chu a lêt tam taka hlâwkna dawng zel tur leh Pathian malsawmna dawng ṭheuh turin an duhsak tak zet tih an tarlang bawk.