Social media-a thu dik lo thehdarh vangin Police hnenah thubuai thehluh a ni

International Paragliding Accuracy Championship, 2020 February 12-16 inkara Serchhipa neih turah Chinese tel turte an thleng tawh tih leh, chu’ng Chinese-te chuan Coronavirus an vei a, Serchhip District Hospital-ah finfiah an ni, tih thu social media hrang hranga darh chu thu dik lo hulhual a nih thu, sorkar thuchhuah chuan a tarlang. Social media-a thu thehdarh chungchangah hian police station-ah thubuai thehluh a ni.

Sorkar thuchhuah tarlan danin, IPAC 2020 Organising Committee chuan, Championship-a tel tur Chinese-te Coronavirus vei anga sawi chu pawi an tih thu an sawi a, “Heng thuthang dik lo hi mipui tichî-âi thei leh Championship tihminghliau theia ngaih a ni a, ram pahnih inlaichìnna thleng pawha thil pawi thei a nih avangin thu dik lo thehdarhtute zawn chhuah an nih theih nan nimin khan Vaivakawn Police Station-ah FIR thehluh a ni,” an ti.

Serchhip District Hospital-a medical superintendent Dr ZD Lalmuanawma pawhin Coronavirus hriléng chu Serchhip leh a chhehvelah kai an awm loh thu leh, Chinese mikhual thleng pawh an awm loh thu a sawi a; mipuite chu thuthang dik lo hi awih lo tur leh thehdarh lo turin a ngen.

February 3, Thawhṭanni khan Whatsapp group ṭhenkhatah Coronavirus chungchang thehdarh a ni a; ‘Serchhipa international paragliding tournament-a tel tura lo kal Chinese paraglider hnen aṭangin Coronavirus an detect tlat mai,’ tih te, ‘Mizoramah test-na a awm loh avangin tunah hian Serchhip Civil Hosp. aṭangin Falkawnah rawn thawn an tum mek a ni awm e,’ tih te, ‘Serchhip district-a mi China-a sumdawnga kal ṭhin pakhat chu rinhlelh a ni,’ tihte thehdarh a ni.

International Paragliding Accuracy Championship, 2020 hi February 12-16 chhungin Serchhip khawpui dâiah neih a ni dawn a; inpuahchahna tluang takin a kal a, mipui a duh apiang chhim turin an sâwm a ni.