Gas bûk tling lo búr 77 hmu chhuak

Champhaia Legal Metrology enforce­ment staff-te chuan nimin khan MIZOFED Gas Agency, Cham­phaia dah tur eirawng­bawlna gas bûr 306 an endik a, bûk tling lo búr 77 an hmu chhuak.

Eirawngbawlna gas-te chu truck registration number AS-11 DC-9733 hmanga phurh thlen a ni a, truck khalhtu Rebul Islam, Ganirgram, Assam chu Legal Metrology Act, 2009 hmanga hrem a ni. Gas bûk tling lote chu a tlin loh zat ang zela chhûtin man tláwm zawkin consumer-te hnena hralh tura tih a ni.

Champhaia Legal Metrology enforcement-te hian June 23, 2021 khan MIZOFED Gas Agency-a dah tur tho gas bûk tling lo búr 18 an lo man tawh a, a phurtu truck khalhtu Alom Hussain Laskar, Lakhipur, Assam chu dan anga hrem a ni bawk.

Gas agency-te hian supply point-a gas an sem chhuah dawnin a bûkna tur (spring balance) an keng ngei tur a ni a, bûk tling ngei chauh lâk a nih theih nan gas búr lâk turte chu bûktir ṭhin turin Legal Metrology chuan mipui an chah a ni.