Nikuma bill lut pe kim

Mizoram State Health Care Scheme (MSHCS) hnuaiah kum 2020 chhunga bill lutte chu June 22, 2021 khan pek chhuah kim a ni a, kumin January thlaa bill lut ṭhenkhat pawh pek chhuah a ni tawh.

MSHCS-a thawkte hnen aṭanga Vanglaini thu dawn danin, MSHCS bill lutte chu chinfel nghal zel a ni a, bill (pawisa) erawh pek chhuah nghal theih a ni lo. Finance department aṭanga sum an dawn ang zelin bill pek chhuah ṭhin a ni a, tun hnai khan cheng nuai 400 an dawng a, chumi hmang chuan nikuma bill lut la pek chhuah loh leh kumin January-a bill lut ṭhen­khatte an pe chhuak a ni.

Finance department aṭangin MSHCS hian direct-in sum an dawng ṭhin a, Treasury kaltlang kher loin damlo bill thehluttute account-ah an thunsak ṭhin.

Damlo bill-te chu damdawi-inte'n MSHCS-ah an thawn ṭhin a, damdawi-in ṭhenkhat chuan a hlawm deuha an thehluh ṭhin avangin damlote'n damdawi-in an chhuahsan veleh an bill-in MSHCS a thleng nghal vek lo a ni.