Covid-19 vei mi 89 thi tawh

Sorkar record angin, nimin thlai dar 5 thleng khan hripui vanga Mizorama thi zat chu mi 89 an ni.

Nimin chhun dar 11:45 khan Covid-19 vei State Referral Hospital-a enkawl lai Zoliana (54) h/o Hawipari, Dawrpui a thi a, nimin tlai dar 5 khan Dawrpui Kohhran Centenary Hall-ah vui a ni. Amah hi Covid-19 positive a ni tih June 6, 2021 khan hmuh chhuah a ni a, June 8 khan SRH-ZMC-ah dah luh a nih thu sorkar thuchhuakin a tarlang.

Lalbiakthangi (61) m/o Zonunsangi, Mission Vengthlang chu June 24, Ningani chhun dar 12 khan Vairengteah heart attack vangin a thi a, a thih hnuah Covid-19 positive a ni tih hmuh chhuah a ni.

Thu dawn danin, Lalbiakthangi hi a fanu Zonunsangi w/o Lalchawimawia, officer in-charge, Vairengte Police Station-te chhungkua tlawhin a zin a, June 24, chhun dar 12 khan a thi. A thih hnuah Vairengte damdawi-inah RAT hmangin a swab sample endik niin, hripui a vei tih hmuh chhuah a ni a, nimin khan Mission Vengthlangah vui a ni.