KHAWTHLIR

Sorkarin rál
State Disaster Response Fund aṭangin June 11, 2021 zana Ṭhuampui, Aizawla Lalbiakzuala in luah lai chima thi mi pali - Lalthlamuani (16), Lalṭanpuii (16), Joseph Lalrinhlua (5) leh Daniel Lalngaihsaka (3) chhungte hnenah zangnadawmna (ex-gratia) Rs. 4,00,000 ṭheuh hlan a ni. Sorkarin zangnadawmna a pek hi a vaiin Rs. 16,00,000 a ni a, Aizawl DC Dr Lalhriatzuali Ralte-in nimin khan an chhungte hnenah a hlân. Hlanna inkhawm hi DC pisaah neih a ni a, DC pisaa officer-te leh Ṭhuampui LC leh YMA hruaitute an tel a ni.

Lawmpuina pe
Mizoram Board of School Education-in HSLC leh HSSLC Examination 2021 result a tihchhuaha Lunglei district aṭanga top-10 a lang zirlai palite chu nimin khan Lunglei DC Kulothungan A-in chawimawina thuziak leh pawisa a pe.

W.Phaileng CCC
Goodwill Foundation leh SBI Foundation hmalaknaa West Phaileng khuaa Covid care centre (CCC) buatsaih thar chu nimin khan deputy govt. chief whip Lalrintluanga Sailo, bialtu MLA-in a hawng.

Kel project tlangzarh
Lunglei High Power Committee (HPC) vice chairman Lawmawma Tochhawng, MLA chuan nimin khan HPC leh AH&Vety department buatsaih, kêl vulh intodelhna tur Goat Farming Pilot Project a tlangzarh. Project bul ṭanna atan hian beneficiary pathum thlan a ni a, kêl panga leh a buaipuina tur Rs. 40,000 ṭheuh pek an ni.

Chhawmdawlna sem
Aizawl district-a khaw hrang hranga chhungkaw 6,138 hnenah CM Relief Fund for Covid-19 aṭangin chhawmdawlna thawh khatna leh thawh hnihnaah Rs. 1,51,28,000 sem a ni tawh a, chhungkaw 4,489 hnenah a thawh thumna atan ṭanpuina sem chhuah leh ṭan a ni.Sorkar thuchhuah tarlan danin, Covid-19 léng thawh hnihna avangin Aizawl DC chuan CMRF for Covid-19 aṭangin chhawmdawlna sem thawh khatnaah Rs. 61,50,000 leh thawh hnihnaah Rs. 89,78,000 a pe chhuak a; home leh centre hrang hrang 43-ah Rs. 14,92,000 pek chhuah mek a ni.