Zirlai 39-te admission fee tumsak

Aizawl North-II bialtu MLA Dr Vanlalthlana chuan nimin khan a bial chhunga college pahnih - Zirtiri Residential Science College leh Aizawl North College-te a tlawh a, admission fee-a harsatna nei zirlai 39-te admission fee a peksak.

Dr Vanlalthlana hian a bial chhunga zirlai admission fee a tumsak 39-te chu Zirtiri Residential Science College-ah zirlai 18 leh Aizawl North College-ah zirlai 21 an ni a; Ramhlun South Branch YMA Kumpuan Committee hmalaknaa an venga zirlai harsa, sorkar sikula lut naupang 10 hnenah ṭanpuina a hlan bawk.

Vanlalthlana chuan, MLA fund chu bial mipui tan a nih avangin Covid-19 hripui léng avanga eizawnna chhunzawm thei lo chhungkaw tam tak harsatna chhâwk zângkhaina atan hman a ni tih a sawi a, "Ramhlun South YMA Kumpuan Committee hmalaknaa an venga zirlai harsa, sorkar sikula lutte ṭanpuina tura an thawhhona hi a ropui a, rah duhawm tak a chhuah ngei ka ring," a ti.