Minister-in kawng siam mek enfiah

Minister of state K Lalrinliana chuan nimin khan a bial, Kolasib constituency chhunga Chemlui, Zukmawi Wet Rice Cultivation (WRC) area-a kawng siam mek a en a, hna thawktute chu ṭha taka hna kalpui tur leh hunbi ngai pawimawh turin a chah.

K Lalrinliana chuan, Chemlui Zukmawi zaua loneitute leh sangha khawitute chu harsatna an tawh hrang hrangte a sawipui a; loneitute’n a hma lama kawng an chhawr vat theih nan chak zawka kawng siam a ṭul thu a sawi. Chemlui Zukmawi zau hruaitute hnenah MLA fund aṭangin lei dawh nan Rs. 1,00,000 a pe nghal bawk.

Chemlui, Zukmawi zaua kawng siam mek hi PMGSY hnuaia loneitute leh sangha dil hmanga eizawngte’n hlâwk leh chak zawka an huan-thlai tharte an seng a, a tihralna hmun tur an thlenpui zung zung theih nana ruahman a ni a; km 13.52-a thui tur niin, September 2021-ah zawh hman tura tih a ni.

K Lalrinliana hian Kolasib DC Circuit House-a lirthei a dahte enkawl chhunzawm nan Joint VC hruaitute hnenah Rs. 15,000 a pe bawk.