Ram hruaitute'n ṭanpuina an pe

Lengteng bialtu MLA L Thangmawia chuan Covid-19 veite phurhna tura a bial chhung, NE Khawdungsei damdawi-in tana MLA fund aṭanga a lei ambulance (Eeco Van) chu nimin khan Mission Vengthlang, Aizawla a chenna in aṭangin a vailiam.

Lunglei South bialtu MLA Dr K Pachhunga chuan nimin khan Lungleia Salem veng, Lunglawn, Luangmual, Sethlun, Theiriat leh Hrangchalkawna Covid-19 avanga ina khung hran (home quarantine)-te tan buhfai leh pawisa eng emaw zat VTF-te hnenah a hlân.

Aizawl North-I bialtu MLA Vanlalhlana chuan a bial chhung Durtlang tlawhin tunlai hrileng dona kawnga Durtlang khawtlangin harsatna an neih leh hmalak zel dan tur an sawiho. MLA hian LTF hnenah ṭanpuina pawisa fai Rs 30,000 a pe.

MPCC general secretary Joseph Lalhimpuia chuan Lunglei High School-a swab sample la tura thawk mek, volunteer mi eng emaw zat hnenah June 24, Ningani khan buhfai, alu, dailuah leh tél ṭhahnem tak a pe bawk.