July 1 aṭanga hman tur SOP SDMA SEC kutah dah a ni

Nimina Health minister Dr R Lal­thangliana hoa sorkar hotute leh páwl aiawhte ṭhukhawm chuan, Mizorama lockdown kalpui mek a tàwp hnu, July 1, 2021 aṭanga inkaihhruaina (SOP) siam turin Chief Secretary kaihhruai State Executive Committee (SEC) on State Disaster Management Authority (SDMA) an ruat.

Ṭhutkhawmah hian DMR minister Lalchamliana, Medical Operational Team (MOT) chairman Dr ZR Thiamsanga, MLA, AMC Deputy Mayor, Indian Medical Association, Medical Operational Team, Joint NGO Coordination Committee, Mizoram Kohhran Hruaitute Committee (MKHC) leh local task force aiawhte leh sorkar official-te an tel.

Meeting chuan, lockdown kalpui meka SOP an thlirho a, dàwr hawn chungchang kalpui zel dan tur te, containment zone puanna hmuna hmalak chhunzawm dan tur te, swab sample endik tam theih dan turte leh thil pawimawh dangte an sawiho a ni.

Ṭhutkhawma rawtna leh ngaihdan hrang hrangte hre chungin July 1 aṭanga hman tur SOP duang turin SDMA SEC an ruat a; tuna SOP hman mek chu June 30-a tàwp tur a ni.

Medical Operational Team leh ICT department-in contact tracing software an buatsaih chu a ṭha tâwka hriat a ni a, hman thuai tura tih a ni. Hei hian contact tracing khawihtu police leh LTF-te nasa taka a chhâwk zângkhai an beisei.