Barcelona-in entu an nei dawn lo

March 18 zana Cham-pions League round of 16 second leg khel tur Barcelona chuan corona-virus hrileng vangin fans nen Napoli an lo mikhual thei dawn lo a, Catalunya sorkar chuan Catalan club hi entu nei loa Italian club lo mikhual turin an hriattir a ni. 

Barcelona hian Napoli hi khualmualah 1-1 in an lo inhnehtawkpui tawh a, quarterfinal lut tura Nou Camp ṭanpuina an mamawh lai takin Barca-in fan-te ṭawiawmna an dawng thei dawn lo. Catalunya sorkar-a health department lam hotupa  Joan Guix chuan, "Hriselna dinhmun ngaih pawimawh avanga he thutlukna hi siam kan ni," tiin a sawi a, Barca tan erawh lawm taka pawm a harsa ang. 

Champions League match zingah Thawhlehni zana Valencia-in Atalanta an mikhual ṭum te, nizana Paris St-Germain-in Borussia Dortmund an mikhualte bakah karleh lama Chelsea-in Bayern Munich an lenchilh turte chu coronavirus vangin an entu an awm lo.