MNYF-in sorkar hmalakna ropui an ti

MNF party ṭhalaite chuan, July 23 leh August 8, 2021 inkara Tokyo, Japan-a Olympics 2020 neih tura India hmeichhe hockey team-a tel tur Lalremsiami, Kolasib hnena Mizoram sorkarin Sports & Youth Services department kaltlanga cheng nuai 25 a pe tur chu ropui an tih thu an tarlang.

MNYF chuan, Lalremsiami chu Olympic-ah a tel dawn avangin Mizoram sorkarin chéng nuai 25 a pe dawn a, tunah nuai 10 pek tawh niin, nuai 15 dang chu Olympic zawhah pek leh tur a nih thu tarlangin, "Kan sorkarin infiammite chawimawina kawngah leh dâwm kânna kawnga hma a lakna ropui tak takte hi lawmawm kan ti tak zet a ni," an ti.

MNF ṭhalaite chuan, Lalremsiami chu Youth Olympic leh Asian Games-ah silver medal a dawn avangin Mizoram sorkarin cheng nuai 20 a pek tawh thu leh a training ṭanpuina atan Mizoram States Sports Council (MSSC)-in Rs. 50,000 a pek tawh thu an sawi a; Olympic an khelh turah medal a lâk dan azirin lawmman dang sorkarin a la siamsak zel dawn tih sawiin, lawmawm an tih thu an sawi a ni.

MNF kaihhruai sorkarin sports policy ṭha tak a duan bakah, hmunhma lamah nasa takin hma a la tih sawiin MNYF chuan, "Infiammite chawi kânna tur leh sorkar hnaa an luh theihna tur kawng a sah kuaksak a ni. Mizo infiammite tana chief minister Pu Zoramthanga leh Sports minister Pu Robert Romawia Royte hmalakna a ropui kan ti a, an kaihhruai leh hmalakna azarah infiamna lamah Mizo ṭhalaite'n harh tharna kan chan ngei pawh kan beisei," an ti.