DC leh SP-in border out post tlawh

Mamit DC Dr Lalrozama leh SP Vineet Kumar te chuan June 24, Ningani khan Saikhawthlir khuaa border out post (BOP) an tlawh.

DC leh SP-te hian Chuhvel leh Saikhawthlir ram chhunga thlám sak avanga buaina awm chungchangah boruak ṭha lo véng tura awmchilh mektute an tlawh a, khawtlang hruaitute nen boruak ṭha a awm theih nana hmalak dan tur an sawiho a ni.

Saikhawthlirah hian tun hnaia boruak ṭha lo thleng avanga Zemabawk aṭanga CRPF platoon khat dahte awmna tur hmunhma an en a, 3rd Battalion MAP leh 4th IR police duty post-te an tlawh bawk.

Dr Lalrozama chuan, sorkarin ram venhim a ngai pawimawh tih sawiin, "Ram dang leh hmun dang aṭanga kan ram chhunga buaina rawn siam an nih chuan a ṭul anga hmalak chu sorkar thil tum a ni," a ti a, sorkar hmalakna ngaichâng thiam turin a ngen.