Lawngtlaiah zirna chungchang sawiho

Lawngtlai District Education Committee chu an chairman Dr Andrew H Vanlaldika, bawrhsap hoin nimin khan DC conference hall-ah an ṭhu a; kum thum kal ta chhunga HSLC leh HSSLC examination-a Lawngtlai district-a sikul hrang hrang result an thlirho.

Kal khawmte chuan, HSLC leh HSSLC-a result ṭha nei turin pawl hniam zawk aṭanga zirna uluk a pawimawh an tih thu te, sikul leh zirlaite harsatna hrang hrang te, zirna tibuaia tibahlah thei nia an hriatte leh a sutkian dan tur te, zirnain hma a sawn theihna tur leh result ṭha zawk neih theih dan turte sawihoin, rawtna hrang hrang an sawi a ni.

Ṭhutkhawmah hian Lawngtlaia School Education department, Lawngtlai khawpuia high school leh higher secondary school principal/headmaster-te leh zirtirtute bakah, Lai Students' Association (LSA), Central Young Lai Association (CYLA) leh Lai Women's Association (LWA) aiawhte an tel.