All NGO & party meeting ko turin ngen

Lunglei District Congress Committee (LDCC) chuan, Covid-19 chu mal beih chi a ni lo a, ṭangruala beih ngai a nih avangin sorkar hian tlawmngai pawl leh political party zawng zawngte ṭhutkhawmpui se an duh thu an tarlang a; an mite chu an awmna ṭheuhah theihtawp chhuah turin an ngen bawk.

LDCC thuchhuah chuan, hripui do turin sorkarin all party & NGO meeting ko se an duh thu leh sorkarin eptu pawlte a mamawh a nih chuan an inrin reng thu an lo tarlang tawh tih sawiin, "Sorkar erawhin ṭul a ti lo a, amaherawhchu, kan ram leh hnam tan a ṭul a nih chuan Congress party chuan he natna hri do hi a ràlthlìr mai dawn lo tih kan sawi nawn a ni," a ti.

Hripui donaah damdawi lam thiam mi eng emaw zat sorkar aṭanga hlawh nei loa inpete chu an ngaihsan thu sawiin LDCC chuan, "Sorkar pawh hian ṭangkai takin a hmang mek tih kan hria a, chutih rualin, an taksa himna tur leh an ei leh in tur leh an mamawh dang pe thei zel turin kan ngensak a ni," an ti a; rál hmatáwnga ding an ni tih sorkarin hria se an duh thu an sawi.