Sikul kal theih dan tur sawiho

Champhai District Disaster Management Authority (DDMA) chu nimin khan an chairman Maria CT Zuali, bawrhsap hoin an ṭhukhawm a; an district-a sorkar sikula zirlai inziak lut zat leh sikul kal theih dan tur an sawiho.

Ṭhutkhawmah hian Covid-19 léng avanga online class kalpui ṭhin chu district-a khaw ṭhenkhatah internet a awm mumal loh avang leh smartphone neih loh avanga harsatna tawk an awm thu tarlan a ni. Champhai khawpui páwna hripui laka fihlim leh himnaahte Covid-19 laka himna tur inkaihhruaina zâwm chunga sikul kal theih dan tur ruahman ṭha an ti.

Champhai khawpui sikulte erawh chu hripui léng awm dan thlir chungin, huap zau zawka inràwnkhawmna neih an rél a; Champhaia School Education department hotute'n sikul hrang hranga zirlai leh zirtirtu awm dante mumal taka zir chiangin, Covid-19 inkaihhruaina bawhchhe loa sikul hawn theih dan tur lo ruahman se, DC office-ah an ruahmannate thehlut se, an ti bawk.

Ṭhutkhawma tarlan danin, June 23, 2021 thleng khan Champhai district-a sorkar enkawl primary school 76-ah zirlai 4,083, middle school 69-ah zirlai 3,586, high school 42-ah zirlai 2,080 leh higher secondary school pahnihah zirlai 743 an awm a ni.