Party tin telna meeting ko turin CYMA-in Chief Minister an ngen

Central YMA hruaitute chuan June 26, Inrinni khan chief minister Zoramthanga a pisaah an kâwm a; June 24, 2021-a Mizoram Kohhran Hruaitute Committee, tlawmngai pawlte leh political party aiawhte nena an thutlukna thlenin, political party tin aiawh telna meeting ko ngei turin an ngen.

CYMA president Vanlalruata hnen aṭanga Vanglaini thu dawn danin, CYMA huaihawta pawl hrang hrangte ṭhutkhawmnaa thutluknate chu tihlawhtling ngei tura an ngen vek rualin, tihlawhtling ngei tura Chief Minister an ngen nasat zual chu, 'Hripui dona kawngah pheikhai rual zawka ṭan lâk a nih theih nan, sorkarin all party meeting ko se' tih a ni.

MKHC, tlawmngai pawlte leh political party hrang hrangte thutlukna CYMA-in an thlente chu Chief Minister chuan lo en zui a, a theih ang anga tihhlawhtlin an tum tur thuin CYMA hruaitute a lo chháng a ni.

Tarlan tawhin angin, Central YMA chuan June 24, 2021 khan MKHC, tlawmngai pawl leh political party hrang hrang aiawhte chu Covid-19 léng mek donaa hmalakho dan tur an sawipui a, resolution pasarih an siam a ni.