Vanapa Hall-ah sample endikna siam

Covid-19 vei chak zawka hriat theihna turin Health department chuan swab sample endik duhte tana awlsam zawka pan theih turin Vanapa Hall-ah Mega Kiosk Covid-19 Testing Centre an buatsaih a, June 26, Inrinni aṭanga hman ṭan niin, Pathianni tih loh ni dang zawngah sample endiktir theih a ni.

Covid-19 chungchanga sorkar thupuangtu Dr Pachuau Lalmalsawma chuan, sorkarin swab sample endik ṭulte endik kim vek a duh vangin ruahmanna siam a nia sawiin, "Mipuite'n awlsam taka an pan theihna tur hmun laili a nih vangin Vanapa Hall hi thlan a ni," a ti a; Health department leh Aizawl DC-te hmalaknain Vanapa Hall-ah hian hmun pathumah sample test-na buatsaih a nih thu a sawi.

Aizawl hmun remchang dangte pawh kiosk siamna tur dap mek a ni tih sawiin Dr Lalmalsawma chuan, "Tun dinhmunah kiosk dang pali - Sihphir UPHC, Bawngkawn South Cultural Centre Hall, Dinthar YMA Hall leh Chawlhhmun Cooperative Society building-ahte kalpui mek a ni," a ti.

Rapid Antigen Test (RAT) hmanga sample endik a rintlak loh anga sawi an awm ṭhin chungchangah Dr Pachuau Lalmalsawma chuan, "RAT hmanga positive hmuh chhuahte chu positive chiang sa anga ngaih tur a ni. Indian Council of Medical Research-in inkaihhruaina a siamah, RAT positive-te chu hmun danga test ngai tawh lo an ni a, RAT negative, symptom nei site chu RT-PCR hmanga test leh tur a ni," a ti," a ti a; thuthang belhchian dâwl lo vanga chîâi lo turin mipui a ngen.