RT-PCR siamtute kan be pawp - Medical Superintendent

Civil Hospital, Lungleia Medical Superintendent chuan, May 7, 2021-a Hospital & Medical Education (HME) Director thupek bawhzuiin RT-PCR supplier leh a siamtu company engineer-te an be pawp tih a sawi.

Gauhati High Court, Aizawl Bench-a Mizoram sorkar lehkha thehluha tarlan danin, Lunglei Civil Hospital (LCH) Medical Superintendent hian May 13, 2021 khan HME Director hnenah lehkha a thawn a, Zodintluanga Ralte, MLA-in RT-PCR a pek bun tura a tih chungchanga a hmalak dan a thlen.

LCH Medical Superintendent tarlan danin, company engineer chuan RT-PCR bun tura mamawh leh ṭul zawng zawngte a awm hunah online hmangin RT-PCR a bunpui theih tur thu a rawn hriattir a ni.

Hetih lai hian, Lungleia micro­biologist awm mek chuan RT-PCR bun chu a la tih ngai loh avangin online hmanga tih chu a rem loah a ngai a, bun turin engineer chu a hmun ngeia kal a ngaih thu a thlen thung a; chu chu company engineer chuan a la rawn chháng leh lo. RT-PCR bun turin mamawh hrang hrang eng emaw zat a la awm bawk.

HME Director hnena lehkha a thawnah hian LCH Medical Superintendent chuan, Expert Team-te'n RT-PCR bunna atana ṭha tura an ngaih chu staff indaih lohna avanga la ruak mai a nih thu a tarlang a, "Room pakhat chu Ayush lamin kudamah an hmang," a ti.

Pindan (room) pathumte chu Cancer Daycare Centre & Palliative Unit leh GNM classroom nen corridor an inṭâwm bakah, chumi floor-ah chuan Medicine Ward, Eye Ward, ENT Ward leh Geriatric Ward a awm a, luhna leh chhuahna an inṭâwm niin LCH Medical Superintendent chuan a tarlang.

Tarlan tawh angin, Gauhati High Court, Aizawl Bench chuan, RT-PCR laboratory atan a luhna hranpa a ngaih thu Mizoram sorkar affidavit-a tarlan a nih chungchangah, "In thar sak nghah ai chuan, in awm saah RT-PCR labo­ratory hman lailâwk tur ruahman­in, a luhna hran a neih dan tur ngaihtuah mai ni se," a ti a ni.