Covid-19 vangin mi 91 thi tawh
Covid-19 hripui vangin June 26, Inrinni khan mi pahnih an thi a, hripui vanga Mizorama thi chu mi 91 an tling tawh.
Hripui vei enkawl lai Lalhuamliana (85) h/o Vanlalthanpuii, Saron Veng, Aizawl chu June 26 zing dar 9:45 khan SRH-ZMC-ah a thi a, Inrinni tlai dar 4 khan Saron Veng Presbyterian Kohhran Jubillee Hall tualah vui a ni. Covid-19 positive a ni tih June 3, 2021-ah hmuh chhuah a ni a, June 8-ah SRH-ah dah luh a ni.
Inrinni vek chawhma dar 11:30 khan Lalhmachhuana (39) s/o Lalhnuni, Chanmari, Aizawl chu hripui vangin SRH-ZMC-ah a thi a, Inrinni tlai dar 3 khan vui a ni. Amah hi Covid-19 vei a ni tih June 16, 2021-ah hmuh chhuah niin, SRH-ah enkawl nghal a ni a; natna dang nei sa a nih thu dawn a ni.
Sorkar chhinchhiah danin, nimin tlai dar 5 thleng khan hripui vangin Mizoramah mi 91 an thi tawh a; Covid-19 léng thawh khatna (March 2020 - March 2021) chhungin mi 11 an thi a, thawh hnihna (April 2021 hnu lam) chhungin mi 80 an thi tawh thung.