KHAWTHLIR

TBCC-ah Covid-19 vei awm lo
June 25, 2021 khan IDSP hnuaia State Field Laboratory Unit chuan Ṭawngṭai Bethel Camping Centre, Sakawrtuichhunah swab sample endik rûnpui an buatsaih a, mi 597 endik zingah Covid-19 positive hmuh chhuah a ni lo. Sample endikte chu mipa 483 leh hmeichhia 114 an ni.

Containment zone
Lunglei Venglai huam chhunga hmun ṭhenkhat, chhungkaw 108-te chênna hmun chu bawrhsap Kulothungan A chuan containment area-ah nimin khan a puang a, Lunglei Salem Veng chu containment zone a nihna a hlîp thung. Aizawl DC pawhin Dawrpui veng hmun ṭhenkhat chu micro-containment zone-ah a puang thar a, Kanan Veng leh Ramthar Veng hmun ṭhenkhat chu containment zone a nihna a hlîp thung a ni.

TNT tanpui
Mizoram Pradesh Congress Committee (MPCC) chuan June 26, Inrinni khan TNT, Muanna Veng hnenah ṭanpuina - tél, sangha ṭín, alu, purùn leh dailuah eng emaw zat an pe. Ṭanpuina hi MPCC Covid-19 Monitoring Committee-te'n TNT hotute hnenah an hlân a ni.

Oxygen concentrator
USA-a NGO pakhat You Matter chuan tun hnai khan Saitual District Hospital tan oxygen concentrator 13 an pe a, a vaiin Rs. 7,80,000 man a ni. Saitual District Hospital-a thawk mek Dr V Lalhmachhuana chuan You Matter kaltlang hian ICU khum pahnih tal nei tura hmalak leh an tum thu a sawi.