ASF vangin vawk 7,798 a thi tawh

Vawk pùl hri, African Swine Fever (ASF) avangin nimin thleng khan Mizorama khua/veng 127 chu ASF infected area-ah puan a ni tawh a, chu'ngah chuan ASF vangin vawk 7,798 a thi tawh.

Animal Husbandry & Veterinary (AH&Vety) department chhinchhiah danin, Mizorama ASF infected area tamna ber chu Aizawl district a ni a, infected area 67 awmin, chu'ng zinga 54 chu Aizawla veng hrang hrangte a ni.

Bawngkawnah nimin thleng khan vawk 220 a thi tawh. Aizawla ASF vanga vawk thi tam berna veng a ni a, Aizawl district-ah Sateek khua chu ASF vanga vawk thi tamna ber a ni. Sateekah hian vawk 759 an vulh a, chu'ng zinga 412 chu ASF vangin a thi tawh a, vawk dam lai 347 an la nei.

Mizorama ASF vei vawk thi hmuh hmasakna ber leh vawk thi awmna hmasa ber Lunglei district-a Lungsen khuaah nimin thleng khan vawk 757 a thi tawh a, Mizorama ASF vanga vawk thi tamna ber khua a ni.

ASF infected area neih dan aṭanga chhûtin, Khawzawl district chu vawk thi tamna ber a ni. Khawzawl district-ah hian infected area-a puan pakhat chiah a awm laiin, nimin thleng khan vawk 323 a thi tawh.

March 21, 2021 aṭanga nimin thleng khan Kolasib district tih loh Mizorama district dang zawng (10)-ah ASF a léng tih finfiah a ni tawh a; chutih laiin, infected area-a puan loh khua/veng 88 (district 11)-ah nimin thleng khan chhan hriat lohin vawk 552 a thi tawh bawk.

Infected area-a puan ni lo zingah Serchhip district-ah chhan hriat loha vawk thi a tam ber a, khua/veng 23-ah vawk 263 a thi tawh a ni.

ASF infected area chhungah department hriatpuinain vawk 86 leh infected area páwnah vawk pariat suat (cull) a ni tawh bawk.

Chhan hriat loha vawk leh sanghal thi a awm chuan phone number 8731975444 leh 8974027269-ah hriattir zel turin AH&Vety department chuan mipui an ngen a ni.