SEDP sum hi tun atan a ni dawn lo'm ni? - C Lalsawivunga, MLA

Aizawl South-I bialtu MLA C Lalsawivunga chuan June 26, Inrinni khan a bial chhunga veng hrang hrang a tlawhnaah thu sawiin, "SEDP sum hi tun atan a ni dawn lawm ni," tiin sorkar a zawt. MLA hian hmasawnna hnathawh mek leh thawh turte a enfiah a ni.

C Lalsawivunga chuan, Covid-19 avanga a bial chhunga hnathawh mek leh hnathawh tur hrang hrang thawh theih a ni lo chu pawi a tih sawiin, "Hripui avanga harsatna mipuiin an tawh mek laia kan ni tin mamawh - tui leh electric bill-ahte mipuite harsatna hriatthiamna sang tak neia kal turin sorkar ka ngen. Mi ṭhenkhatte thawktu lam aṭanga disconnect mai tura vauna rawngkai titih ka bial chhunga mite pawhin an dawng nia sawi a awm a, en zui vat turin sorkar ka ngen a ni," a ti.

Kut hnathawktute'n an thlai thar hralhnaah harsatna an tâwk mek nia sawiin C Lalsawivunga chuan, "ZPM Legislature Party pawhin kan aupui lawm lawm a ni. A chinfelna kawng khat leh rang ber Vegetable Supply Chain nghak khawmuang loa kalpui nghal turin sorkar ka ngen. SEDP sumte hi tun hun atan a ni dawn lo em ni?" a ti a; a bial mipui tan party bik sawi loa theihtawp a chhuah zel tur thu a sawi.