Mamawh dik tak hre turin phût

Mizoram Pradesh Youth Congress Committee (MPYCC) chuan thuchhuah siamin, Covid-19 léng thawh thumna a thlen hmaa Mizoram mamawh dik tak hre turin Mizoram sorkar an phût tih an tarlang.

Mizoram chauh ni lo, khawvelin tuna a mamawh chu hriselna lama mi thiam leh inpete an nih thu tarlangin MPYCC chuan, "Covid-19 hian tuifâwn ang maiin khawvel a nuai mek a, ṭum hnih na takin min nuai tawh. A ṭum thumna pawh na tak a nih leh dawn avangin kawng hrang hrangin invenna chikim a ngai. A pawimawh hmasa - laboratory technician, health worker, nurse leh doctor-te a rang lama sorkarin hna thawk turin a seng luh a ngai a, rang taka a lak kan phût a ni," an ti.

MPYCC chuan, sorkarin pawisa a nei lo a, harsatna nasa tak a tâwk anga a sawi reng laiin, ṭul hmasa rih lo zirtirtu ṭhahnem tak lâk a tum leh tih tarlangin, "Sum hmanna tam tak en hian kan sorkar hian hripui do hi hna takah a nei lo niin a lang. Raw-mi atana sum tam tak sèn te, airport cute ber siam tum vanga sum khawhralte hi thil pawimawh hmasa ber niin a lang lo," an ti a; mahni sahimna leh chhungte dinhmun hlauhawma siam mek volunteer zawng zawngte sorkarin duhsak se an duh thu an tarlang.