Press accreditation card hlân

Champhai DC Maria CT Zuali chuan nimin khan IPR conference hall-ah Champhai district (Khawzawl district telin)-a press accreditation hmu mi 13 hnenah press accreditation card a hlân.

Maria CT Zuali chuan, chanchinbumite chu district hmasawnna tura theihtawp chhuahtu leh thawh hlâwk berte zinga mi nia a hriat thu sawiin, "Media-in nasa takin hma a sawn a, mipui hawiher tidanglam thei tura mawhphurhna lian tak nei in ni. Sorkar thu leh hla puan chhuah kawngah in thawh hlâwk avangin sorkar pawhin media mi leh sate a ngai pawimawh hle," a ti a; ram leh mipui rawngbawlnaah thawhhona ṭha tak neih zel a ṭul thu a sawi.

Mizoram sorkara Press Accreditation Committee-in kum 2021-23 chhunga accredited journalist ni thei tur a thlan zingah Champhai district (Khawzawl district telin)-ah mi 13 an awm a; mi 10 chu Champhai district-a mite niin, mi dang pathum chu Khawzawl district-a mite an ni.