Lungleiah chhiatna laka invên dan tur sawiho

Lunglei District Disaster Mangement Authority (DDMA) chu an chairman Kulothungan A, bawrhsap hoin nimin khan DC conference hall-ah an ṭhukhawm a; fûrpui laia chhiatna thleng thei laka invên dan tur leh rîkrum thila hmalak dan turte an sawiho.

Kulothungan A chuan, khuarèl chhiatna thleng thei laka inven leh inhmakhua lâwk a ṭul thu sawiin, "Fûr lai chuan fimkhur leh inrálrin reng a ṭul. Chhiatna kaihhnawiha district-a mawhphurhna chelhtute in nih angin in hmazâwn ṭheuhah uluk takin inpuahchah ang che u," a ti a; mipui himna atan theihtawp chhuah turin a chah.

Ṭhutkhawmah hian de­part­ment hrang hrangte'n an inpuahchah dan leh hma­chhawpte an sawi a; Health department chuan, fûr laia hri léng thei - sikserh, cholera leh typhoid laka mipui him theih nan hmalakna kalpui mek zel a nih thu an sawi. Lunglei DCSO chuan, buhfai dah khawl sa a ṭhat tâwk thu leh district chhunga supply centre pasarihah October thla thleng daih tur a awm thu a tarlang.

2nd battalion MAP hnuaiah State Disaster Response Force (SDRF) training chhuak mi 99 awmin, tun dinhmunah mi 67 chu battalion headquarters-ah an awm a, chhiatna kaihhnawih bungraw hrang hrang neih mekte leh mamawhte, quick response team dinhmun te, adventure club leh tlawmngai pawlte nena thawh­ho dan turte an sawiho nghal.

Incident commander-te chu an bial ṭheuha Hazard Vulnerability Mapping siam tura tih an ni a; in, electric ban, thingkung hlauhawm theite leh leimin leh tui len hlauhawmte report kimchang siam a, July 10, 2021 hmaa thehlut tura tih an ni.

Chhiatrupna a thlen palha mipui him taka dah khawm theihna tur hmun (disaster shelter) atan khaw tinah VCP kaltlangin enfiah lawk ni se an ti a; DDMA whatsapp group siama chhiatrupna laka invenna leh chêt lak dan tur zirtirna awareness/advisory buatsaiha thehdarh turin a kaihhnawih department-te mawhphurna pek an ni bawk.

Ṭhutkhawmah hian DDMA member, Lunglei district-a chhiatna kaihhnawih incident commander te, Fire & Emergency Services hotu te, khawtlang hruaitute leh YMA sub-hqrs hruaitute an tel a ni.