Sipai hotuin Larsap leh CM kâwm

Nimin khan Raj Bhavan-ah Governor PS Sreedharan Pillai leh sipai hotu, general officer commanding-in- chief, Eastern Command Lt.Gen. Manoj Pande-te an inkâwm a, ram venhimna kaihhnawih leh thil pawimawh dangte an sawi dun.

Lt.Gen. Manoj Pande hian nimin vêk khan chief minister Zoramthanga pawh a pisaah a kâwm a, ramri chungchang leh thil chi hrang hrang an sawi dun a ni.

CM Zoramthanga chuan, Assam Rifles chu ramri vên leh environment humhalh kawngah an thawh hlâwk thu a sawi.

Lt.Gen. Manoj Pande chuan, Assam Rifles leh Mizoram sorkar inkarah inkungkaihna ṭha a awm chu lawmawm a tih thu leh tun hnu zelah pawh inkungkaihna leh thawhhona ṭha a awm zel a beisei thu a sawi a; ruihhlo do kawngah Mizoram sorkar leh Assam Rifles-te'n thawhhona ṭha an neih zel a pawimawh thu a sawi bawk.