MNF sorkarin Housing for All hmangin Party politics an khel - CLP Leader

Congress Legislature Party (CLP) leader Zodintluanga Ralte chuan MNF sorkar chu Housing for All (Pradhan Mantri Awas Yojana - Urban) hmanga party politics khèlah a puh.

Zodintluanga Ralte hian nimin khan thuchah tichhuakin, sorkar laipui programme PMAY-U hnuaia in sakna tur sum dawngtu tur thlan tawhte chu tunlai hian MNF sorkarin an tidanglam niin a tarlang a, "An party-a hming pe lût ve lote chuan an sum dawn tur an chán ang tiin party hamṭhatna atan khaw hrang hrangah hman an tum hi a pawi ka ti hle," a ti.

PMAY-U hnuaia ṭanpuina dawng tura thlan tawhte hi sorkar laipui pawmpui tawh a ni tih sawiin CLP Leader chuan, "An hminga sum a dah hran thlap tawh a nih avangin MNF sorkarin a nawm a mâka a tihdanglam theih a ni lo," a ti a; scheme chu India-in zalenna champha vawi 75-na, kum 2022-a khawpui lian deuha in nei lote'n chenna in ṭha zawk an neih theihna tur a nih thu a sawi.

UDPA Minister hlui sawi danin, Beneficiary-led Construction Scheme hnuaiah in sak ṭanpuina Rs. 1,50,000 ruahman theih a ni a, Demand Survey Application hmangin ṭanpuina dawng theite tan kum 2015, 2016 & 2017 khan in sak ṭanpuina dilna hun hawn a ni. Dilna lûtte chu department-a thawktute'n LC/VC leh tlawmngai pawlte phungbawmah sáwmin, a diltute in an tlawh chhuak a, uluk takin a hmunah an enfiah a ni.

Endikna report chu district tinah district screening committee (DSC)-ah pharh a ni a, DSC-in BLC scheme hnuaia in sak ṭanpuina dawng thei tura a pawm 17,670 hmangin khaw 23 tan BLC DPR siam niin, sorkar laipuiah thlen a ni. Sorkar laipuia Ministry of Housing and Urban Affairs-in a pawmpui tawh bawk.

Zodintluanga Ralte chuan, uluk taka in tina kala endik hnua project siam a nih thu sawiin, "A dawngtu tur thlan diam tawh a ni a, a dawngtu tur list hi state sorkar emaw, sorkar laipui emaw pawhin a tihdanglam theih a ni tawh lo. MNF sorkarin a duh dan dana a sawp kual theih a ni tawh lo tih hi Housing for All dawngtu tura thlan tawh chhungkuate ka hrilh duh a ni," a ti.

UDPA department-in PMAY-U hnuaiah DPR thar a duang zel tih sawiin Zodintluanga chuan, "January 2021 pawh khan Aizawl leh Darlawn khuaa PMAY-HFA diltute UDPA Director hoa enfiah a ni," a ti a; sorkar laipuiin in nei lo leh tlabal tawhte tana hamṭhatna a siam chu party hamṭhatna zawn nan hman chi a nih loh thu a sawi bawk.