Luia nungcha humhalhna dan siamṭhat mek a ni
Luia nungchate humhalh turin Fisheries department chuan dan an siamṭha mek a, hman thuai beisei a ni.
Vanglaini palai zawhna chhángin Fisheries department hotute chuan, Central YMA nena luia nungchate humhalh turin hma an lak dawn thu an sawi a, "Hemi atana thawhhona thuthlung tur kan siam (draft) chu administrative-ah kan pe a, anni'n Law & Judicial-ah an kaltir leh mek," an ti a; CYMA nen an enho leh hnuah an pawm tlàn chuan hman nghal a ni dawn tih an sawi.
Fisheries department hotute chuan, luia nungcha la puitling lote chu man phal a nih loh thu sawiin, "Tunah hian lui dung nungchate humhalhna dan kan nei tho a, mahse, huam zau zawk tura siam ṭhat kan tum mek. Luia nungcha dan loa mantute mai ni lo, a zuar chhâwngtute thlenga man leh hrem theih dan tur awm se kan duh," an ti.
An thil tum ber chu luia nungcha man khap a nih loh thu sawiin Fisheries hotute chuan, "Luia nungchate awmze neia humhalh leh mipuiin hlâwkna an tèl theih tura enkawl hi kan tum ber a ni a, hmalak zel kan tum," an ti a; luite awmze neia humhalh a nih chuan a chhehvela awm mipui tan eizawnna tling a nih theih thu an sawi.
Tun hnaiah dan loa luia nungchate man an awm fo thu leh chu'ngte chu a theih chin chinah an chhui zui ṭhin thu an sawi a, "Kan mante chu dan angin kan hrem ṭhin. Mahse, department mi leh sa kan tlem avang leh kan huam chin a zauh avangin dan bawhchhiate hi kan hmuin kan hre séng vek lo a, Mizoram mipui puihna kan ngen a ni," an ti.
Fisheries department hotute chuan, state leh district-ah Fisheries Conservation Board an din tawh thu leh village-ah din leh tur a nih thu te, dan loa luia nungcha mante chu district tina Fisheries department-ah hriattir zel theih a nih thute, Fish Info Mizoramah lui humhalhtute inziah luhna tur an siam thu te, The Mizoram Fisheries Conservation Rewards Scheme, 2019 hnuaiah lui humhalhtute tan leh dan bawhchhiate man emaw, finfiahna ṭha tak nena hriattir emaw an awm chuan department-in a enfiah hnuah lawmman pek tlaka a ngaihte tan Rs. 1,000 - Rs. 50,000 thleng pek theih a nih thute an sawi bawk.