Mizoram sorkarin oil palm chíngtute Cheng nuai 100 vel a batsak mek

Mizoram sorkar chuan oil palm chíngtute pawisa cheng nuai 100 vel a batsak mek. Hetih lai hian, oil palm chíngtute pawisa tur hi sorkarin K-deposit-ah a dah nia thu dawn a ni.

Mizoram sorkar chuan oil palm chíngtute'n hlâwk zawka an thara an hralh theih nan te, Mizoramah oil palm chìnin hma a sawn zel theihna atan leh Prime Minister-in hmarchhakah uar lehzuala oil palm chìn a nih theihna tura hmalakna kal zel tihhlawhtlinna atante oil palm chíngtute'n kg. khat an hralhin price support Rs. 4.50 zela pui turin kum 2020 tàwp lam khan thutlukna a siam a ni.

Ruahmanna hi sorkar laipuiin Special Assistance for States for Capital Expenditure a ruahman aṭanga kalpui tura tih a ni a, cheng nuai 240 ruahman a ni. He sum hmang hian oil palm chíngtute chu oil palm an hralh hunah kg. khat zelah company-in a leina bakah Rs. 4.50 an pe dawn a, company pawh kg. khat zelah Re. 1 pek tur a ni bawk.

Tun hma chuan oil palm chíngtute hnen­ah price support pek ṭhin a ni a, MNF sorkar pawhin pek chhunzawm mah se, sum harsatna avangin an pe chhunzawm thei lo. Kum 2020 tàwp lamah ruahmanna thar, kg. khat zelah price support Rs. 4.50 pe turin thutlukna siam a ni a, January 2021-ah pek ṭan tura tih a ni.

Oil palm chíngtute hian oil palm rah chu a leitu company hnenah kg. khat Rs. 5.30-in an hralh ṭhin a, sorkarin a puihna Rs. 4.50 nen, Rs. 10-in an hralh thei tihna a ni. Hetih lai hian, oil palm chíngtute chuan nimin thleng khan sorkar aṭangin price support an la dawng lo. A leitu pawhin Mizoram sorkar aṭanga kg. khata Re 1 zel an dawn tur an la dawng lo.

Mizorama oil palm leitu company lian ber Godrej Agrovet hotute hnen aṭanga Vanglaini thu dawn danin, kumin January-June chhungin oil palm rah cheng nuai 117.5 man an lei tawh. Godrej hian kg. khat Rs. 5.50-in an lei a, Mizoram sorkarin kg. 1 zelah oil palm chíngtute Rs. 4.50 a pek dawn avangin, sorkarin oil palm chíngtute pawisa a bat chu cheng nuai 100 vel tihna a ni.

Vanglaini palai zawhna chhangin Kolasib District Oil Palm Growers Society hotute chuan, price support chungchangah October 2020 vel khan State Planning Board hotute nen an indawr tih an sawi a, "Kan harsatna leh mamawhnate hriaa kg. khat zela Rs. 4.50 pek min remtihsak hi kan lawm hle. Hman nghal kan rawt a, anni lam duh dan angin January 2021-a hman ṭan turin thutlukna siam a ni," an ti.

Kolasib District Oil Palm Growers Society hotute chuan, price support dawn hlân an nghahhlelh thu sawiin, "Kan hriat danin, price support tur hi a awm vek tawh a, mahse, vawiin thlengin cheng khat mah kan la dawng lo," an ti a; price support dawng thei se chuan an dinhmun a ziaawm phah tur thu an sawi.

Oil palm chíngtute buaipuitu Agriculture department hotute chuan Vanglaini palai zawhna chhángin, oil palm price support tur sum chu K-Deposit-ah a awm thu an sawi a, "Kan nawr ve reng a, engtikah nge a chhuah dawn kan hre bik lo. A rawn chhuak ve vat turah kan ngai a, a rawn chhuah hunah oil palm chíngtute hi kan pe thei ang," an ti.