KHAWTHLIR

Mizoram quota
Higher & Technical Education department chuan, NEET leh JEE-in a huam loh Mizoram state quota-a professional course hrang hrang dil tumte tan July 13, 2021 thleng dhte.mizoram.gov.in/page/smatee ah online-in dilna thehluh theih a nih thu a tarlang. Form hmasa email hmanga thehlut tawh tan tih nawn a ngai lo a, a duh tan hman zui theih a ni.

Heroin man
Excise & Narcotics department leh Assam Rifles-te ṭangrual chuan nimin khan Chite vengah heroin gram 153 leh a neitua puh mi pahnih an man. Heroin an man hi tualchhunga hralhna ang chuan Rs. 68,85,000 man a ni.

Hmanrua pe
Health minister Dr R Lalthangliana chuan nimin khan a bial chhunga Hnahthial Hospital-ah Covid-19 dona hmanrua chi hrang hrang a pe a, thlaphâng lo turin a bial mipui a chah. Hnahthial damdawi-in tan hian PPE 300, kut tihfaina litre 100, N-95 mask 100, kutkawr leh damdawi chi hrang hrang a pe a ni.

Dragon fruit thlang
Kolasib District Monitoring Committee for the Formation and Promotion of 10,000 Farmers Producer Organization chu nimin khan an ṭhukhawm a, Kolasib district FPO atan dragon fruit-ah hmalakna ni se an ti. Sorkar laipui hmalaknaa FPO 10,000 dinte hian an indin aṭanga kum thumna thleng ṭanpuina cheng nuai 18 an dawng thei a ni.

CM Relief Fund
Chief Minister's Relief Fund for Covid-19 ah nimin khan páwl leh mimalte'n Rs. 86,000 an thawh a, CMRF bank account-a a pung (interest) Rs. 47,775 nen nimina lut zat chu Rs. 133,775 a ni. Nimin thlenga CMRF for Covid-19-a sum lut tawh chu Rs. 26,98,48,678 a ni a, Rs. 25,24,94,470 hman tawh niin, hman loh Rs. 1,73,54,208 a la awm.

MLA-in tlawh
Champhai North bialtu MLA Dr ZR Thiamsanga chuan nimin khan a bial chhunga khaw pali - North Diltlang, Hnahlan, Khuangphah leh Vaikhawtlangte a tlawh a, VTF-te hnenah Rs. 50,000 a sem. Ṭiau lui depa ramri duty-te hnenah silpauline, kut tihfaina, hmai tuamna leh pawisa a pe bawk.