Remna Ni lawm a ni dawn lo

MNF party chuan thuchhuah siamin, naktuka Remna Ni vawi 36-na thleng tur chu Covid-19 hripui léng avangin an lawm thei dawn lo tih an puang.

Boruak zalên chu ni se Remna Ni chu ram pum huapa ropui taka lawm an duh tih sawiin MNF chuan, "Covid hripui avanga kan in lockdown bakah, sorkarin SOP-te siama kan zawm tlân vek a la ngaih avangin tun ṭum chu kan duh angin lawm a rem dawn lo tih kan inhriattir a ni," an ti.

MNF chuan, Remna Ni pualin mahni awmhmun aṭanga hun hman a nih theih nan TV-ah prog­ramme an buatsaih dawn tih tarlangin, "Chief minister Pu Zoramthang­a'n Remna Ni thuchah a sawi ang a, MNF party aiawhin treasurer Pu K Vanlalauva'n thuchah a sawi bawk ang," an ti a; 'Farewell to arm' tih documentary film tih­chhuah chhunzawm a nih dawn thu an tarlang.