Kolasib district-ah CD ratio 56.29%
Kolasib bawrhsap Dr H Lalthlangliana kaihhruaiin nimin khan DCC/DLRC/DLSC an ṭhu khawm. Kumin January-March chhunga Kolasib district-a bank hrang hrang credit deposit (CD) ratio chu 56.29% a ni tih an tarlang.
Ṭhutkhawmah hian sorkar hnuaia scheme hrang hrangte bank nena ṭangkawpa kalpui dan tur leh loneitute leh eizawnna hrang hrang bul ṭanna leh chhunzawmna atana kum 2021-22 chhunga sum pek chhuah dan tur an sawiho a ni.
Annual Action Plan 2021-22 pharh a ni a; Kolasib district-a bank hrang hrangte chu cheng nuai 12,873.69 pe chhuak tura bituk a ni. Pek chhuah tur zingah agriculture leh a kaihhnawiha loan pek chhuah tura bituk chu cheng nuai 5,794.99 niin, pek chhuah tur zingah a tam ber.
Meeting-a tarlan danin, January-March, 2021 chhungin Kolasib district-a bank hrang hrangte sum dawn aṭanga an pek chhuah (CD ratio) chu 56.29% a ni a; PMMY hnuaia loan pek chhuah chu account 596 aṭangin 727-ah a pung.
Stand Up India scheme hnuaiah mi pariat hnenah loan pek a ni a, self help group 313-te chu bank nen inthlun zawm mekin, khawsak harsa zual (economically weaker section)-te bank account 5,211-ah cheng nuai 8,609.60 pek chhuah a ni tawh.
Bank hrang hrangin loan a pek chhuah, thla thum chuang rûl tawh lo, non-performing account anga ngaih chu priority sector hnuaiah 1,955 leh non-priority sector-ah 210 a awm mek a; March 2021 thlengin PMSBY dil thei bank account 55,213 awm zingah 10,558 ziah luh a ni a, PMJJBY dil thei 39,849 zingah diltu 6,969 an awm bawk.
Kolasib Bawrhsap chuan, bank dawrtute dawnsawn kawngah inelna thianghlim nei turin bank hotute a chah a, "Hripui léng karah ei tur nei lo, hna thawk thei lo bawka hripui hmachhawn ai chuan, ei tur tlâkchham awm loa hna thawk theia mipui kan siam a ngai. Bank-te hi eizawnna chhunzawm hlei thei lote dâwm kângtu pawimawh tak in ni," a ti.
Dr H Lalthlangliana chuan, Kolasib-a ATM booth-ahte chuan kut tihfaina a awm reng tur a nih thu te, ATM leh bank-te chu venhimna hmanraw ṭha nen a ṭul anga thawm ṭhata vil reng a pawimawh thute a sawi bawk.