DC leh press mite'n Covid-19 sawiho

Mamit DC Dr Lalrozama leh Mamit district-a chanchinbumi (accredited journalist)-te chu nimin khan DC conference hall-ah an inkâwm a, Covid-19 hripui darh zel tur vênna atana sorkar hmalakna puanzar chungchang an sawiho.

Dr Lalrozama chuan, Covid-19 vaccine chu mithiamte'n a him tih an finfiah thu a sawi a, "Hlauthâwng loa la vek tur mipui ka ngen a ni," a ti.

Tun hnaiah state danga zin duhte tan an zinna tur state-te'n sorkar hotute hriatpuina lehkha phût an awm ṭhina hriat a nih thu sawiin DC chuan, "Mi tu pawh, kan state ṭhenawm Assam leh Tripura-a ṭul bik thila zin duh tan DC office-ah permit a dil theih," a ti a; khawi hmunah pawh fimkhur taka awm a ṭul thu leh task force-te'n an veng chhung ṭheuh an vil uluk a pawimawh thu a sawi.

Inkawmhonaa tarlan danin, Mamit district-ah hian khum 186 awmna Covid care centre leh khum 120 awmna community covid care centre pakua a awm a, sorkar ruahman quarantine facility pathum a awm bawk.

Mamit district-ah Covid-19 vaccine la thei tur mi 60,326 an awma ngaih a ni a; mi 32,529-in first dose la tawhin, mi 3,769-in second dose an la tawh a, vaccine la dawng lo mi 24,028 an awm.

Kanhmun screening point-ah mi 12,834 endik tawh a ni a, chu'ng zinga mi 60 chu Covid-19 vei an ni tih hmuh chhuah a ni.